லிங்கு சாமியும் இயேசு தாசும் பின்னே ஃ பிளிப் கார்ட்டும்

சோசியல் மீடியாவின் ட்ரெண்டிங்கில் இருக்க வேண்டியது அவசியம் தான். அதற்காக ஒரு விஷயத்திற்காக உடனுக்குடனடியாய் பொங்குவதும் பின் அதையே பிடித்து தொங்குவதும் அவசியம் இல்லாதது.

லிங்கு, ஜேசுதாஸ் தொடங்கி பிளிப்கார்ட் வரையில், எல்லா விஷயங்களிலும், படம் தொடங்கி பத்தே நிமிடத்தில் விமர்சனத்தை தட்டி விடுகிற மாதிரியான பரபரப்பு, படப்பிடிப்பெல்லாம் எதற்கு ?

லிங்கு மேட்டரை விடுங்கள். அவர் காமெடி பண்ணினார். அதனால் நாம் ஓட்டினோம். ஜாலியாய் சிரித்து அவ்விடயத்தை ஸ்ட்ரெஸ் பஸ்டர் ஆக்கினோம்.

****

ஜேசுதாஸ் அவர்கள் லெக்கிங்க்ஸ் பற்றி பேசாமல் ஜீன்ஸ் பற்றி பேசும் போதே தெரிந்து கொள்ள வேண்டாமா, அவர் லண்டனில் வாழ்ந்தாலும் / வாழ்வதாலும் இங்குள்ள ட்ரெண்டிங்ற்கு இன்னும் அப்டேட் ஆகாமல் இருக்கிறார் என்று.

***

ஃபிளிப் கார்ட்டிற்கு ஒரு சின்ன உதாரணம் சொல்கிறேன். இந்த தீபாவளி சீசனில் ரங்க நாதன் தெருவில் கூடும் ஒட்டு மொத்த கும்பலும் ஒரே நேரத்தில் ஒரே கடையில் நுழைந்தால் என்ன ஆகும் என்று யோசித்து பாருங்கள். சரி நுழைந்து விட்டார்கள். நுழைந்த அனைவருமே ஒரு சில ஃஆபர் குறிப்பிட்ட பொருட்களின் மீதே கை வைத்தால் என்ன ஆகும் என்றும் திங்க் ட்வைஸ். கண்டிப்பாய் உயிர் சேதம் ஏற்படும் அல்லவா. அப்படி தான் நேற்று செத்து போயிருக்கிறது ஃபிளிப் கார்ட்டின் செர்வர்.

சோ, நடந்தது லாட்டரி சேல்ஸ் மாதிரி தான், பம்பர் அடித்தது ஒரு சிலருக்கு எனில் தேவுடு காத்து Sold Out/Out of Stock பாத்து பேஸ்தடித்தவர்கள் பல பேர். அவர்கள் வெளிப்படுத்திய உள்ளக்குமுறல்கள் தான் ஃபிளிப் கார்ட்ற்கு கிடைத்த மோசடி நிறுவனம் என்கின்ற பட்டம்.

இவர்கள் இதற்கு முன்னமே கூட கிட்டத்தட்ட இதே நடைமுறையில் ஃபிளாஷ் சேல்ஸ் என்று Motorola மற்றும் Xiaomi கம்பெனிகளின் மொபைல் போன்களை விற்றிருக்கிறார்கள். அதில் வாங்க முயற்சித்து..வாங்கியவர்கள், வாங்க முடியாதவர்கள் – அறிவார்கள். நேற்று என்ன நடந்திருக்கும் என்று. வெறும் நாலு செகண்டில் 30,000 போன்கள் விற்ற ரெகார்ட் இருக்கிறது.

பிளிப்கார்ட் பொறுத்தவரையில் அவர்கள் தவறுகளிடமிருந்தே நிறைய பாடங்களை கற்று வருகிறார்கள். அதற்கு நாம் என்ன பரிசோதனை எலிகளா என்று கோபம் வருவது நியாயம் தான். ஆனால் ஒரு உண்மையை ஒத்து கொண்டே ஆக வேண்டும். சாதாரண நாட்களில் மால்களில் கிடைக்கும் விலையை விட பிளிப்கார்ட் குறைவான விலைக்கே விற்றிருக்கின்றன, அதுவும் fast delivery, cash on delivery, 30 days cancel/return back போன்ற நல்ல பல சேவைகளுடன்.

ஆகவே தானத்திலே சிறந்த தானம் நிதானம் என்கின்ற பொதுமறை செய்தியுடன்……